លោកជំទាវបណ្ឌិតសភាចារ្យ ពិនិត្យមើលស្ថានភាពជាក់ស្តែង និងផ្ដល់អនុសាសន៍ណែនាំក្នុងការកែលម្អផ្លូវទស្សនានៅប្រាសាទអង្គរវត្ត ដែលអាចផ្ដល់បទពិសោធន៍ថ្មី ជូនភ្ញៀវមកទស្សនា ព្រមទាំងគិតគូរយ៉ាងល្អិតល្អន់សម្រាប់ការរៀបចំទទួលការទស្សនារបស់គណ:ប្រតិភូនៃកិច្ចប្រជុំកំពូលហ្រ្វង់កូហ្វូនី លើកទី២០ ក្នុងខែវិច្ឆិកា ឆ្នាំ២០២៦ នាពេលខាងមុខ៕

គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និងសំបូរព្រៃគុក(ICC-Angkor /Sambor Prei Kuk) បានបើកកិច្ចប្រជុំបច្ចេកទេសលើកទី៤២ រយៈពេល២ថ្ងៃ (៩-១០ មិថុនា ឆ្នាំ២០២៦) នៅសណ្ឋាគារសុខា អង្គរ។ កិច្ចប្រជុំបច្ចេកទេសនេះ ផ្តោតលើការជជែកលម្អិតជុំវិញការងារជួសជុល អភិរក្ស និងអភិវឌ្ឍន៍ប្រកបដោយចីរភាព នៃតំបន់រមណីយដ្ឋានអង្គរ និងសំបូរព្រៃគុក។

នាថ្ងៃទី៨ ខែមិថុនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញចុះពិនិត្យស្ថានភាពទូទៅ ជាក់ស្តែង និងវឌ្ឍនភាពការងារនៅទីតាំងមួយចំនួនក្នុងតំបន់រមណីយដ្ឋានអង្គរ និងតាមដានការអនុវត្តការងារពាក់ព័ន្ធនឹងការអភិរក្ស ការគ្រប់គ្រង និងការលើកកម្ពស់តម្លៃបេតិកភណ្ឌវប្បធម៌ ស្របតាមគោលនយោបាយ និងផែនការអភិវឌ្ឍន៍ប្រកបដោយចីរភាព ក្នុងគោលបំណងពង្រឹងប្រសិទ្ធភាពនៃការគ្រប់គ្រងរមណីយដ្ឋាន ដោយធានាបាននូវតម្លៃជាសកលដ៏លេចធ្លោនៃបេតិកភណ្ឌ។