នាថ្ងៃអាទិត្យ ៤រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២ ខែសីហា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌និងិចិត្រសិល្បៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង ព្រមទាំងក្រុមការងារ បានអញ្ជើញប្រគេនទៀនចំណាំព្រះវស្សា និងទេយ្យទាន ដល់ព្រះសង្ឃចំនួន ៧វត្ត មកពីឃុំចំនួន២ រួមមានឃុំអណ្ដូងត្របែកចំនួន ៥វត្ត និងឃុំក្រសាំងចំនួន ២វត្ត។
ពិធីនេះបានប្រារព្ធធ្វើឡើងនៅវត្តពោធិ៍ឧត្ដម ហៅវត្តអណ្ដូងត្របែក ស្ថិតនៅឃុំអណ្ដូងត្របែក ស្រុករមាសហែក ខេត្តស្វាយរៀង ដោយមានការអញ្ជើញចូលរួមពី សំណាក់ឯកឧត្តម លោកជំទាវ លោក លោកស្រីក្រុមការងារ លោកប្រធានក្រុមប្រឹក្សាស្រុករមាសហែក លោក លោកស្រីមេឃុំ មេភូមិ គណៈកម្មការអាចារ្យវត្ត តាជី យាយជី និងពុទ្ធបរិស័ទចំណុះជេីងវត្តជាច្រេីននាក់។
ក្នុងឱកាសនោះ លោកជំទាវបណ្ឌិតសភាចារ្យបានមានមតិសំណេះសំណាល និងពាំនាំនូវប្រសាសន៍ផ្ដាំផ្ញើសួរសុខទុក្ខរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ប្រគេនដល់ព្រះតេជគុណដែលនិមន្តមកពីវត្តទាំង៧ និងជូនដល់លោកយាយ លោកតា បងប្អូនប្រជាពលរដ្ឋដែលបានចូលរួមក្នុងកម្មវិធីនេះផងដែរ។
ចំពោះទេយ្យទានដែលបានប្រគេននាឱកាសនោះរួមមាន ទៀនចំណាំព្រះវស្សា សាដក អង្ករ ទឹកក្រូច ទឹកផ្លែឈេី ទឹកសុទ្ធ តែ កាហ្វេ ទឹកដោះគោ មីជាតិ ទឹកត្រី ទឹកស៊ីអ៉ីវ ប្រេងឆា អំបិល ស្ករស ប៊ីចេង ខ្ទឹមស ព្រមទាំងបច្ច័យមួយចំនួន៕
